Health Care Scheme-ah party dangin sawi tur an nei lo - Dr ZR Thiamsanga
Health & Family Welfare Board vice chairman Dr ZR Thiamsanga, MLA chuan nimin khan Mizo Hnam Runa inkhawmah thu sawiin, "Mizoram State Health Care Scheme hi MNF bul ṭan leh kalpui a ni a, party dangin sawi tur an nei lo," a ti.
Dr ZR Thiamsanga chuan, "Health Care Scheme (HCS) hi chu Pu Zoramthanga'n MNF ministry hmasa hun lai, state dangte'n tih nacháng an hriat ve hmaa a ngaihtuah chhuah leh bul ṭan liau liau a ni," a ti a, bul ṭan nan HCS sum báwmpui (corpus fund) siamin cheng vbc. 50 dah a nih thu a sawi.
ZR Thiamsanga chuan, HCS atan MNF sorkarin kum 2008-ah Asian Development Bank loan dil a ni a, Congress sorkar pian hnu kum 2009-ah loan vbc. 117 hmuh a nih thu sawiin, "Congress sorkar khan HCS sum awm sa an rochung a, MNF sawi chhuah sa pawh an kalpui hlei thei lo a, kum khat leh thla li vel lai an titawp nghe nghe. Kum 10 chhung khan corpus fund atan cheng khat mah an dah lo a, healthcare hi sawi ngam tur an ni lo. La sorkar ve lo party-te phei chuan sawi tur an nei lo," a ti.
Covid-19 buaina leh sum indaih lohna avangin HCS-ah harsatna a awm tih sawiin Dr Thiamsanga chuan, "Kum pangngai ni se chuan healthcare bill bá kan nei lo ang. Covid avangin harsatna kan tâwk a, bá nei lo thei kan ni lo. Kan ba hlen dawn lo a, kan rûl chho mek a, kan la rûl vek dawn," a ti a; MLA-te'n an hlawh aṭangin HCS atan thla tin 1% ṭheuh an thawh thu a sawi.
Inkhawmah hian Mizoram Youth Commission (MYC) chairman Dr Vanlalṭanpuia, MLA pawhin thu sawiin, "Kum 2023 inthlanpuiah Zoram mipuite'n MNF party an khawngaih leh dawn a, kan sorkar leh dawn," a ti.