KHAWTHLIR

Túmkau Ni
Naktuk Pathianni hi Túmkau Ni (Palm Sunday) a ni a, Mizoram hmun hrang hrangah naupangte'n tumkau cháwiin Pathian chawimawi nan kawng an zawh dawn a, kawngzawh lo tur tualchhung kohhran tlem azawng an awm bawk. Mizorama kohhran lian ber Presbyterian Kohhran chuan thupui zir tur an siam a, chawhnu inkhawmah 'Isua hnen thlen hi ropuina a ni' tih leh zan inkhawmah 'Chawimawi phu Isua' tih an zir dawn a ni.

Hriselna Kûtpui
Aizawl bawrhsap Dr Lalhriatzuali Ralte hoin nimin khan a pisaah sorkar hotute'n Health department-a Aizawl West leh Aizawl East district chhunga Hriselna Kûtpui (Block Health Mela) neih dan tur an sawiho. Hriselna Kûtpui hi April 18-22, 2022 chhungin neih a ni dawn a, a thlâwna inentir theih a nih dawn bakah, zunthlum, thisen sang, ka (mouth) chhung cancer leh TB-te endik nghal a ni ang.

MNF an tling
April 7, Ningania Chhinga Veng leh Tuikhuahtlanga local council by-election-a vote tlate chu zanah chhiar nghal a ni a, veng pahnihah hian MNF candidate ve ve thlan tlin an ni.

Alu seng
Krishi Vigyan Kendra, Siaha chuan April 7, Ningani khan Noaotlah ram chhunga Beinô lui kam, Hmaihrem záwlah ICAR-IARI NEH hnuaia alu (Kufri Jyoti- variety) chìnte seng hun an buatsaih a, district bawrhsap Lalsangliana'n a hmanpui.

DGP-in tlawh
Director General of Police (DGP) Devesh Chandra Srivastava chuan nimin khan 3rd MAP chu an hmunpui, Mualpuiah a tlawh. DGP hi 3rd MAP commandant C Lalzahngoa'n a lo dawngsawng a, office building leh hmunhma hrang hrang a tlawh kual bakah, police-te hmaah thu a sawi a; 3rd MAP-in harsatna an neihte chu sutkiansak a tum thu a sawi.