MSU-in MRB Chairman an ngen

Mizo Students’ Union (MSU) chuan, Mizoram Rural Bank (MRB)-a thawk zinga Local Language Proficiency Test (LPT) paltlang zo lo mi pali chawlhtir turin MRB chairman V Jaya Chandra an ngen.

MSU chuan, "MSU hian MRB hnuaia RRB leh MRB rules-in a phût anga LPT paltlang zo lo hna thawka chhawrte chu a thlithlai reng a, kumin 2022-a SCERT buatsaih LPT exam result hnuhnung berah mi pali - Manohar Thakur, Dwarika Nath Jha, Rajan Kumar Jha leh Mohan Lal Das te hian LPT an paltlang zo lo a ni," an ti.

MSU hruaitute chuan MRB-a thawk, LPT paltlang zo lote an chhuina kal zelah April 7, 2022 khan MRB Chairman an hmu a; RRB leh MRB rules anga chawlhtir (withdraw) an nih theih nan hma an lak zui nghal thu an hrilh. MRB Chairman chuan, MRB Management Rules anga a chawlhtir tur thu a lo hrilh tih MSU chuan an tarlang.