Kângmei laka invênna inzirtir

Fire & Emergency Services (FES) chuan nimin khan Lunglei Press Club-ah kângmei chungchanga media mite zirtirna, Special Training on Fire Safety and Fire Prevention for Media Personnel an buatsaih. Kumin 2022 chhungin Lungleiah kângmei vawi kua a chhuak tawh a, bungrua Rs 2,80,000 hû a kâng ral tih tarlan a ni.

Training-ah hian Lungleia FES Station officer T Lalchhandama'n kângmei chhuah theih dan te, a hlauhawm dan te, fimkhur dan turte leh kângmei chhuak ṭan tìr ṭhelhna (fire extinguisher) hman dante a sawifiah.

He huna tarlan danin, kum 2021 khan Lungleiah kângmei ṭum 29 a chhuak a, chu'ngte chu chenna in kâng pahnih, ram kâng ṭum 19, bawlhhlawh paihna hmun kâng ṭum sarih leh gas kâng vawi khat a awm a ni. Kângmei chhuak avang hian Rs 6,25,000 hû bungrua a kang chhia.

Kumin 2022 chhungin kângmei chhuak ṭum kua report a awm tawh a, chu'ngte chu chenna in kâng pathum, bawlhhlawh paihna hmun kâng ṭum li leh ram kâng ṭum hnih a ni a, bungrua Rs 2,80,000 hû a kang chhia a ni.

Tun dinhmunah Lunglei FES-ah hian thawktu mi pariat leh kâng ṭhelh motor pahnih a awm a; thawktu indaih lohna avangin 2nd MAP aṭangin mi pasarih dah mek a ni bawk.

Training-a hriattur an tarlante
1) In kan chhuahsan dawn emaw, kan mut dawnahte kan inchhungah leh kan inbulah kangmei tichhuak thei thil a awm leh awm loh uluk takin enfiah ṭhin tur a ni
2) Petrol, diesel, khawnvartui te hi mei aṭanga hla taka dah ṭhin tur
3) Mombati - inchhung parda, puanzar leh thosilen bulhnaiahte chhit loh tur
4) Thuka meichhemte kalsan dawnah uluk taka tihmit ṭhin tur a ni
5) Vawk chaw chhumna aṭang hian kangmei a chhuak duh viau a, kalsan dawnah uluk takin mei tihmit ṭhin tur a ni
6) Electric wiring ṭha lo avangin kangmei a chhuak nasa hle a, electric wiring-te uluk taka endik ṭhin tur a ni. A thiamte chauh wiring khawih tir ṭhin tur a ni. Electric hmanrua ṭha chauh hman tur
7) Ar vulhnaa current kan pawhluh ṭhin hi uluk takin endik reng ṭhin tur a ni
8) Electric hmanrua heater, cooker, istiri etc. ti nung chungin kalsan loh tur a ni a, hman zawhah plug aṭangin phawi zel tur a ni
9) Kan in bul hnaite uluk takin tihfai ṭhin tur a ni a, kangmei ti chhuak thei bawlhhlawh leh thil kang awlsam chite inbulah chhehkhawm ṭeuh loh tur
10) Gas cylinder kan thlak dawnin a bul hnaiah mei tih nun loh tur a ni
11) Meizial bung a nung chungin paih mai mai loh tur