Agri. Minister-in ár awp kêuna a hawng

Agriculture minister C Lalrinsanga chuan April 7, Ningani khan Krishi Vigyan Kendra (KVK), Serchhip district-in North Vanlaiphaia ár awp kêuna (poultry hatchery) an buatsaih a hawng a; thlai chìn dan hlawhtling taka an enchhin tawh leh hnathawh dan phung ziahna lehkhabu a tlangzarh bawk.

C Lalrinsanga chuan, district thar pathumah KVK dah thuai an duh tih sawiin, "Kan lehkhate pawh tunah Prime Minister pisaah a awm mek. Kan ram hi Pathianin mal a sawm a, kan thlai chi enchhin hrang hrangte an thar ṭha ṭhin hle. Lintel dâl kan enchhin phei chu a thar hlâwk lamah ram pum chawhrual aiin a sang zawk a ni," a ti.

Eibàr mamawhte tam zawk leh felfai zawka thar a nih theih nan sorkarin Land Leasing Act leh Collective Farming System a ngaihtuah tih sawiin Minister chuan, "FOCUS hmalakna hmangin awmze nei zawka buh leh bâl thar chunga leilung leh ramngaw venhim hna thawh mek zel a ni a, KVK scientist-te'n kut hnathawktute tan in pawimawhzia hriain theihtawp chhuah zel ang che u," a ti a; N Vanlaiphai khawtlang hruaitute'n loneitute mamawh an dilte chu a theih chinah ngaihtuah a nih tur thu a sawi.

Ar awp keunaah hian a rualin artui 500 a awp keutir theih a ni.