North East on Wheel-ah Mizo pali

Amazing Namaste Foundation buatsaihin vawiin aṭanga April 17, 2022 thlengin bike hmanga hmarchhak state hrang hrang tlawh chhuahna, North East on Wheel buatsaih turah April 13-15 chhungin biker 15-te'n Mizoram an rawn tlawh dawn a, Mizo pali an tel dawn.

Amazing Namaste Foundation hruaitute hian nimin khan Aizawl Press Club-ah thuthar thehdarhtute an kâwm a, an convener Lalhmingsangi chuan, NE on Wheels chu April 9 zingah Assam chief minister Himanta Biswa Sarma-a'n Guwahati aṭangin a vailiam dawn tih a sawi.

NE on Wheel secretary Asomi Andrew sawi danin, Mizoram rawn tlawhtu turte chu biker 15 an ni dawn a, châkkhai phur dangte nen an vaiin mi 24 an ni dawn. Mizorama an chàm chhungin Mizo hmun hmingthang leh pawimawhte an tlawh dawn a, Mizo nula Rosalind chu team pilot a ni ang.

North East on Wheel-ah hian India ram hmun hrang hrang aṭangin biker 75 an tel dawn a, km. 1,400 ṭheuh an tlan tlin hnuah Guwahati-ah an lêt leh ang. Ni kaw chhunga an tlân kawng thui zawng belh khawm chu km. 1,00,000 tling tura ngaih a ni.