Ni 5 chhung hripui vei thi an awm tawh lo

April 7, Ningani khan Mizoramah Covid-19 vei mi 123 hmuh chhuah a ni a, India ramah Kerala, Maharashtra leh Delhi dawta hmuh tam berna a ni. Nimin khan hripui vei dam tawh mi 102 chhuahtir an ni a, Covid-19 vei thi an awm lo a, a záwnin ni nga chhung hripui vanga thi an awm tawh lo.

Covid-19 vei hmuh tharte chu TrueNAT hmanga hmuh pahnih, RAT hmanga hmuh 120 leh FIA hmanga hmuh pakhat niin, positivity rate chu 17.06% a ni a; mipa 46 leh hmeichhia 77 an ni.

April 8-a Mizorama Covid-19 vei hmuh chhuah zat 123 chu India ramah Kerala, Maharashtra leh Delhi dawta hmuh tam berna a ni a, state leh union territory dang zawngah chuan mi za aia tlem vek hmuh chhuah a ni.

Nimin tlai dar 5 thleng dinhmun angin, April 3 hnuah hripui vanga thi Mizoramah an awm tawh lo a, a záwnin ni nga chhung Covid-19 vei thi an awm tawh lo. Covid-19 positive inenkawl mek zat a tlahniam zel bawk.

IDSP record angin, Mizoramah Covid-19 vei 2,25,336 hmuh chhuah a ni tawh a, mipa 1,05,006 leh hmeichhia 1,20,330 an ni a, mipa aiin hmeichhia 15,324-in an tam zawk. Nimin tlai dar 5 thleng khan mi 2,23,915 (99.37%) chhuahtir an ni tawh a, mi 687 (0.30%) thi tawhin, enkawl mek mi 734 (0.33%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,25,336 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.