Lengteng bial hmasawnna sawi dun

Chief minister Zoramthanga leh Lengteng bialtu MLA L Thangmawia te chuan April 7, Ningani khan Chief Minister's Office-ah HRD Board hmalakna leh Lengteng bial hmasawnna chungchang an sawi dun.

L Thangmawia chuan, hripui léng karah a bial chhunga hmasawnna tam tak thleng chu lawmawm a tih thu sawiin, Ngopa khuain kum 2024-a KṬP Genral Conference a thlenna tura inbuatsaihna atana special package cheng nuai 50 a ruahmansak avanga a lawm thu a sawi a; KṬP General Conference thleng tura Ngopa khawtlang inruahman dan leh an mamawhte a thlen nghal.

Zirtirtu thar lâk theih a nih loh laia SEDP aṭanga School Education Minister kaihhruai HRD Board-in zirtirtu 500 chuang lawmman tur a pek thu sawiin L Thangmawia chuan, "Zirtirtu tam takin an hlawh thawh khawma zirtirtu an rawih ṭhinte leh khawtlangin mamawhna avanga vantlang suma zirtirtu an rawih ṭhinte chu hei hian nasa takin a chhâwk zângkhai a ni," a ti.

Sorkar thuchhuah tarlan danin, Chief Minister hian primary school leh middle school-a zirtirtu la indaih loh zualnaa harsatna phuhrûk nan SEDP aṭangin zirtirtu 30 lawmman tur a pek belh a ni.