Ramri chhehvela kawng laih man sorkarin cheng nuai 1,603 a bá

July 2021-a Assam leh Mizoram ramri a buai hnua ramri leh a chhehvela kawng laihna atana JCB leh khawl dang hman man Mizoram sorkarin cheng nuai 1,603 a la bá.

July 26, 2021-a Vairengte leh Lailapur inkara Mizoram leh Assam police-te inkah hnuah state pahnihte chuan ramri leh a chhehvelah kawng laih hna an thawk a, hmun hrang hrangah kawng an lai a ni.

Mizoram sorkar chuan kawng laihna atan mimal JCB leh kháwl dangte a hmang a, khawl a hman mante chu ṭhenkhat pe tawh mah se, tun dinhmunah cheng nuai 1,603 a la ba mek.

Kawng laih hna hi hlawm thumah ṭhen a ni a, hlawm khatna (Phase-I)-ah chuan kawng laih man cheng nuai 200.4 thehluh niin, bill pek vek tawh a ni. Hlawm hnihnaah chuan kawng laih man cheng nuai 507.30 a ni a, cheng nuai 152.19 pek tawh niin, la pek loh cheng vbc. 355.11 a la awm. Phase III-ah chuan kawng laihna bill cheng nuai1,248.85 a lut a, a vaiin sorkarin a la bá a ni.

Kawng laihna atana bill thehluh zawng zawng chu cheng vbc. 19.56 a ni a, kawng laih man pek tawh zat chu cheng vbc. 3.53 niin, la pek loh chu cheng vbc. 16.03 a awm.

Hetih lai hian, kawng laih chin tak chu chhin­chhiah (record) fel a la ni loa thu dawn a ni. Thuneitute hnena thuthar thehdarhtute'n an zawh pawhin a zat tak an la sawi thei lo a, km. 100 chuang hret nia sawi a ni. Kawng laih hna vil tur hian mi 13 ruat an ni a, Bilkhawthlir BDO tih loh chu village council leh YMA hruaitute vek an ni.