Model Code of Conduct bawhchhiaah BJP-in MNF hruài sorkar an puh

BJP, Mizoram Pradesh chuan, Mara Autonomous District Council (MADC) MDC inthlanpui puan a nih tawh hnuah Election Model Code of Conduct bawhchhiain MNF hruai Mizoram sorkarin Siahaah vaimim chi an sem tih an tarlang.

BJP chuan, May 5, 2022-a MADC MDC inthlanpui neih tur thu State Election Commi­ssion-in April 5, 2022 khan a puang tih sawiin, "MADC area-ah Model Code of Conduct puan nghal a ni. April 9, Inrinni chhun dar 12 khan Siahaa Agriculture office-ah Siaha khawpui chhung bik tan SEDP aṭangin vaimím chî sem a ni. Model Code of Conduct puan a nih tawh laia MNF flagship programme SEDP sem a ni ta mai hi SEC zahlohna leh Model Code of Conduct bawh­chhiatna a ni," an ti.

Thuneihna îta Mara fate retheihna hman ṭangkai tumah puhin BJP chuan, "SEDP sum sem tur an neih loh avanga thil nepnawi MNF party-in an sem ta mai hi Mara mipui zahlohna leh hmusitna ah kan ngai," an ti a; Model Code of Conduct bawhchhiat chungchang chu BJP, Siaha district-in SEC-ah leh Mizoram People's Forum-ah an hriattir a, action la ngei turin an phût tih an tarlang.

BJP chuan, BJP chu ram leh hnam himna leh hmasawnna buaipui mektu awm chhun an nih thu leh Mara mipuite tan nasa takin hma an lak mek thu tarlangin, "MADC MDC general election-ah Pathian leh Mara mipui zarah BJP chuan hneh takin sorkarna kan chang leh ngei dawn a, Maraland hmakhua thlirin, BJP lo chu kan hnam damna a awm lo a ni," an ti.