Petrol ṭha tâwk lo thawn lêt

Serchhipa petrol pump pakhat, PB Lalzuithanga Filling Station-a dah tur petrol phurh thlen chu endikna aṭangin a ṭha tâwk lo tih hmuh chhuah a nih avangin February 4, 2020 khan thawn lêt a ni.

Sorkar thuchhuah tarlan danin, tanker MZ-06 5527-in February 1, 2020-a petrol (extra premium) litre 12,000 a phurh thlen chu Legal Metrology enforcement-te'n inspector Johny Zonunmawia hoin an endik a; delivery challan-a density inziak 759.9 chu Serchhipa endik a nih hian a tling tawh lo a, density chu 763.7 a ni tih hmuh chhuah a ni.

Motor Spirit and High Speed Diesel (Regu­lation of Supply & Distribution & Preven­tion of Malpra­ctices) Order, 2005 ang chuan, petrol/diesel density hi a nih dan tur pangngai 

aṭanga pathum aia tamin a danglam tur a ni lo (pathum aiin a tam emaw, a tlem emaw tur a ni lo).

Tanker MZ-06 5527-in petrol extra premium a phurh thlenah hian khawnvartui pawlh a ni ngeia hriat a ni a, dan angin tanker khalhtu Lalrinpuia, Chhiahtlang leh a motor chu man nghal a ni. Essential Com­modities Act sawi angin, tanker leh a khalhtu chu Serchhip DC hnenah Legal Metrology chuan February 3 khan an hlan.

Serchhip Additional DC thupek angin petrol chu February 4 khan endik nawn leh a ni a, tanker pindan (chamber) tina petrol phurhte chu danin a phût ang a tling lo vek tih finfiah nawn a ni. Hei vang hian February 4 vêk khan tanker chu a petrol phurh nen an lakna hmun Silchar-ah thawn lêt leh a ni.