Vairengte SDO(C) sawnna order Sût turin Mizoram sorkar phût

Vairengte khuaa páwl palite chuan Vairengte SDO (Civil) Isaac C Lal­rempuia sawn tumna chu hun lo an tih thu an tarlang a, transfer order sût turin Mizoram sorkar an phût.

Vairengtea pawl pali - Vairengte Ṭhalai Pawl, Social Reconstruction & Enlightenment (SORE), MZP leh MSU-te chuan resolution siamin, "Assam nen kan buai chung changa hmingṭha tak Dr H Lalthlangliana, DC, Kolasib district sawn a nih hnu lawka Vairengte SDO(C) sawnna thu a awm zui nghal thut hi kan hrethiam lo hle. Ramri chungchanga engkim hre chiangtu a nihna angin kan SDO(C) tal hi chu sawn rih loh ni se kan ti," an ti.

Chief minister Zoram­thanga'n a tiam anga transfer order chung­changah sorkar hmalakna a awm leh si lo chu pawi an tih thu sawiin pawl palite chuan, "April 4, 2022 (Ningani)-a CM-in a intiamna ang ngeia transfer order cancel-na lehkha hmuh thuai kan duh," an ti a; ramri chungchanga SDO(C) hmalak mekna leh hma­bakte chu tuna an SDO(C) ngeiin zo fel thei se an duh thu an tarlang.

Ramri hnaiha status quo bawhchhiaa Assam lamin hma an lak mek lai leh ramri chungchanga buaina a la reh fel hmaa officer dik leh huaisen sawn an ni zel chu ṭha lo an tih thu an sawi a; SDO(C) sawn tumna chu an dodal tlat thu an tarlang bawk.