Mizo ṭhalaite infiamna kawngah sorkarin puih zel a tum - CM

Zemabawk North Games & Sports Association buatsaih Undivided Zemabawk Football League chu April 9, Inrinni khan Zemabawk field-ah zawh a ni a, kharna inkhawm hmanpuitu bialtu MLA Zoramthanga, chief minister chuan, infiamna lamah Mizo ṭhalaite sorkarin puih zel a tum thu a sawi.

Chief Minister chuan, Mizo ṭhalaite tan football leh infiamna chi hrang hrangah India leh ram páwn thlenga hlawhtlin theihna ṭha tak a awm thu a sawi a, "Infiamna kawngah sorkar chuan theih ang anga puih zui zel a tum a ni," a ti.

India rama football club hrang hrangah Mizo tlangval tel an awm nual thu sawiin Zoramthanga chuan, "Hlawh ṭha tak an nei a, chhungte tan chhenfâkawm nih an tling a, eizawnna ṭha tak an nei hi an fakawm hle. Infiamnaah a mi lâktlak ni tur chuan taksa hrisel neih a pawimawh hmasa a ni," a ti a, ruih theih thil leh zûk leh hmuam laka insûm a pawimawh thu a sawi.