ZORO-in Myanmar MP/MLA thla an hual

Zo Reunification Organization (ZORO) chuan, Myamar ram a buai avanga Mizorama ráltlân zinga Aizawl leh a chhehvela awm mek Myanmar MP leh MLA-te thlahualna hun April 9, Inrinni khan Youth Hostel Association of India (YHAI) hmun, Luangmualah an buatsaih.

Thlahualna inkhawm hi ZORO president R Sangkawia'n a kaihruai a; ZORO Ṭhalai president L Ramdinliana Renthlei-in thu sawiin, Myanmar MP leh MLA-te chu Mizoramah inti mikhual lo tur leh Mizoram chu an ram a ni tih hre turin a chah.

L Ramdinliana chuan, "Burma ram democracy a nih theih nan kan bei mek a, ZORO chuan Mizoram hi India aṭanga inlâk hran tumin kan bei ve mek bawk. Democracy kan nih theih nana kan beihna leh independent kan sualnaah hian kan hlawhtlin hma chu kan bei tur a ni," a ti.

Myanmar-a Chin state chief minister Salai Lian Luai chuan, Myanmar aṭanga lo kal MP leh MLA-te chu hmun hrang hranga mite an nih thu sawiin, "Kristian kan ni vek lo a, sakhaw hrang hrang nei kan ni a, kan ram danah chuan Kawl leh Zo fate hi unau ang maiin kan ṭangrual a ni," a ti a; Myanmar chu democracy a nih theih nan hma an la mek tih a sawi.

Salai Lian Luai chuan, ZORO policy leh thiltum chu an rilrua an pawm sa vek a ni tih sawiin, "Mizoram mipuite'n kan harsatna hriaa min lo dawnsawn danah thinlung takin lawmthu kan zavai aiawhin ka sawi a ni," a ti.

Thlahualnaah hian hnam inpum­khatna tur kawng hrang hrang sawiho a ni a, zanriah an kîlho bawk.