Minister-in sorkar hmalaknate a tlawh

Minister of state TJ Lalnuntluanga chuan April 9, Inrinni khan Champhaia District Court Complex sakna tur, Conservator of Forests (CF) pisa leh quarters sakna tur leh Khelthliahlui tui lâkna tur a tlawh a, sorkar hotute leh khawtlang hruaitute nen hmalak dan tur an sawiho.

Law & Judicial minister TJ Lalnun-tluanga chuan, tunlai thiamna leh model thar ber hmangin Champhaiah District Court complex siam tum a nih thu sawiin, "Mizorama hmasa ber, zahawm leh model ni thei turin ruahman a ni a, senso leh hmalak dan turte ṭha taka duangin sorkar laipuiah thlen tum a ni," a ti a; ruahmanna siam kawnga pui turin judicial officer-te leh architect-te'n Delhi District Court, Saket an tlawh thu a sawi.

Environment Forest & Climate Change (EFCC) minister TJ Lalnuntluanga chuan, Champhaiah Conservator of Forests (CF) Eastern Circle dah tura ruahman a nih thu sawiin, "CF pisa leh quarters sakna tur sum dah a ni tawh a, ṭul dangte buaipui fel veleh hna ṭan tum a ni," a ti.

TJ Lalnuntluanga chuan, Champhaia tui harsa mek tihziaawm a nih theih nan Dilkawn leh Zokhawtharah tui connection pek ṭan a ni a, Melbuk leh Zotlangah tui connection kalpui mek a nih thu sawiin, "Ruantlang leh Mual Vengah tui mamawh duh anga neih loh avangin Khelthliahlui chu ni zung chakna hmang ṭangkaia lak tum a ni," a ti a, chak taka bawhzui an tum thu a sawi.