Minister hoin dailuah sen chi seng Mizorama thar ve theihte tam zawk thar theih nan hma kan la zel dawn - Rinsanga

Agriculture minister C Lalrinsanga hoin April 9, Inrinni khan East Lungdar khaw ram, Tuipui zaua KVK Serchhip district-in enchhinna atana dailuah sen (lentil dal) an chînte chu seng a ni. Minister chuan, Mizorama thar ve theihte tam zawk thar a nih theih nan hma an la zel dawn tih a sawi.

C Lalrinsanga chuan, Serchhip KVK scientist-te'n Mizoramah lentil chìn theih tura enchhinna hlawhtling taka an kalpui chu ṭha a tih thu sawiin, "Kan rama kan thar ve theih reng state dang aṭanga chaw lut a, pawisa tam tham tak ram páwna chhuak ṭhin hi a veiawm a, kan ramah tam zawk kan thar theih nan hma kan la zel dawn a ni. Dâl mai ni loin, alu pawh chìn pun tumin hmalak mek a ni a, tissue culture hmanga alu chìn punna tur Thingdawl ramah kan kalpui dawn a, NEC aṭangin cheng vbc. 2 kan hmu dawn a ni," a ti.

Agriculture Minister sawi danin, India ram hmun dangah dailuah an thar theih zat(national average) chu hectare khatah quintal 7.5 a ni a, a chìn dan tur ang taka leiṭhate nena enkawl chuan Mizoramah hectare khata thar theih zat chu quintal 7.8 a tling. India ram hmun dang aiin Mizorama thar theih zat chu hectare khatah kg. 30-in a tam zawk.

C Lalrinsanga chuan, SEDP hnuaia kum 2019-20 chhunga vaimim pilot project chu hlawhtling taka kalpui a nih thu sawiin, "SEDP vaimim pilot project hmanga tharte chu ran chaw atan Lunglei High Power Committee leh AH&Vety department kaltlangin vaimim ro, a fang nuai thlak kg. khat Rs 25 zelin kut hnathawktute leisak an ni tawh," a ti a; Serchhipa Agriculture department pawhin kut hnathawktute tharte leisakin, damdawi dang nena sâwngbàwlin vawk leh ar chaw atan siam ṭhin a nih thu a sawi.

Dailuah sen sengnaah hian Agriculture director James Lalsiamliana, Serchhip DAO Tlangtimawia, Serchhip KVK hotu Kenny Zohmingliana leh hotu dangte leh East Lungdar khawtlang hruaitute an tel a ni.