Kan policy kan din chhuahpui ngam, Kan tlâkpui ngam bawk - Lalduhoma

ZPM leader Lalduhoma chuan April 9, 2022-a Lengteng biala khaw ṭhenkhat a tlawhnaah thu sawiin, "ZPM chuan kan policy hi kan din chhuahpui ngam a, kan tlakpui ngam bawk," a ti.

Lalduhoma chuan, sorkarin kut hnathawktute a hnungchhawn a, Agriculture department leh Agriculture Minister awm ve bawk mah se, ruahmanna leh budget an siamin thingtlang kut hnathawktute a huam ngai lo nia sawiin, "Kan sorkar chuan party sorkar a ni dawn lo, mipui sorkar a ni dawn," a ti a; ZPM chuan hlâwk zawk leh mumal zawka kut hnathawktute'n hna an thawh theihna turin hma an la dawn a, kawng an kawhhmuh dawn tih a sawi.

Mizoramah ram àwl, chhawr ṭangkai loh a la tam tih sawiin Lalduhoma chuan, "Hengte hi kan sorkar chuan 'Zau system' kan introduce dawn a, chumi-ah chuan farm village kan din ang a, thlai chìn bik kan nei dawn. Chutah chuan, electric, tui, sikulte kan din ang a, kawng ṭha tak kan siam dawn bawk a ni," a ti a; "Kum tina lo neih insawn ngai loin, eizawnna ngêlnghet kan siam dawn a, kut hnathawk mi taima tawh phawt chu bána kaih policy hmangin kan inkai chhuak dawn a ni," a ti bawk.

ZPM consultant F Rodingliana pawhin thu sawiin, "Kan ram hi politics kal sual avangin a chhe zawngin a thang mek a, kan hmingchhiatnate leh kan retheihnate hi politics aṭang vêkin siamṭhat a ngai a ni," a ti a; ṭhalai lehkhathiamte anmahnia an dinchhuah theihna turin bul an ṭansak dawn a, rethei leh hausa inkar zau tawh lutukte chu kalphung thar hmangin an siamṭha dawn niin a sawi.

ZPM Leader hian Lengteng bial chhunga Pàwlráng, Hliappui, Chhawrtui, Puilo, Vanchéng, Dulte leh Kawlkulh khuate a tlawh a; Lengteng bial a fan chhungin khaw 14 aṭangin ZPM zawm thar mi 1,030 a lawm lut niin ZPM thuchhuah chuan a tarlang.