KHAWTHLIR
Thisen pe
KṬP, Bungkawn High School Veng Branch chuan an din champha vawi lina pualin April 9, Inrinni khan an kohhran hall-ah Synod Hospital tan thisen unit 21 an pe a, petute mipa 18 leh hmeichhia pathum an ni.
Minister-in hawng
Minister of state Robert Romawia Royte chuan April 9, Inrinni khan a bial Aizawl East-II chhunga Armed Veng South-ah kawngpui siam thar leh anganwadi centre sak thar a hawng. Anganwadi centre hi CDS sum Rs 5,07,148, a MLA fund Rs 1,00,000 leh mipui thawh khawm Rs 38,900, a vaiin Rs 6,46,048 hmanga sak a ni a; kawng hawn tâk hi MLA fund Rs 10,00,000 hmanga siam a ni.
PS tur enfiah
Siaha district election officer leh bawrhsap Lalsangliana, MADC inthlan tura returning officer ni bawk chuan tun hnai khan Siaha district khawthlang lama Phúrà, Pala, Lodaw, Lomasu, Bymari leh Tokalo khuate a tlawh a; MADC inthlana polling station atana hman tur sikul hrang hrangte dinhmun leh an mamawhte a enfiah.
DC-in khua fang
Lunglei DC Kulothungan A chuan April 7-8, 2022 chhung khan Bunghmun RD block a tlawh a, sorkar leh khawtlang hruaitute nen hmasawnna tura hmachhawp leh harsatnate an sawiho. Bawrhsap chuan, Lunglei district leh mipui dinhmun tihmasawn tura district level committee hrang hranga chairman a nih angin khaw mite mamawh leh ṭhatpui tur thilte sawipui tura tlawh a nih thu a sawi.
Heroin man
Champhai police-te chuan April 9, Inrinni zan khan Chalbawiha péngah Biakthanawn (20), Haikhawl, Myanmar hnen aṭangin heroin gram 322 an man. Heroin hi international market-ah cheng nuai 161 man a ni.
Kawng thar
Lunglei district High Powered Committee (HPC) vice chairman Lawmawma Tochhawng, MLA chuan April 9, Inrinni khan Rotlang East khuaa Silai Tlak Mual aṭanga balu lakna tur kawng siam thar a hawng. Kawng hi km. 1.1-a thui a ni a, HPC sum nuai 13 hmanga siam a ni.