MzSSDEM hnuaia hmalakna sawiho

Mizoram State Skill Development & Entrepreneurship Mission (MzSSDEM) hnuaia State Executive Committee (SEC) chu April 8, Zirtawpni khan an chairman Lalramsanga Sailo, Labour, Employment, Skill Development and Entrepreneurship (LESDE) secretary hoin Secretariat conference hall-ah an ṭhu a, hmalak dan tur an sawiho.

Lalramsanga Sailo chuan, Mizorama skill development chak taka kalpui a nih theih nan rilru inhmu tlanga hmalak a pawimawh tih sawiin, "Skill training hmanga mihring hman tlak chher chhuah hi mimal leh ram dinchhuahna bul, ram hmasawnna hnuk pawimawh tak a ni," a ti a; thawktute chu nasa lehzuala inpea thawkho turin a chah.

Ṭhutkhawmah hian Mizorama skill development programme hrang hrang baseline survey LESDE department-in a neih leh Mizoram Skill Mission Portal an thlirho a; member-te chu skill training kalpuinaah state-in a mamawh dan azira National Skills Qualifications Framework (NSQF) aligned course thlan thiam theih nan NSQF nihphung leh SEC pawimawhna leh mawhphurhnate hrilhfiah an ni.

MzSSDEM SEC-ah hian skill development lama hma latu sorkar department 14-a director te, university aiawh te, industry neitute aiawh leh training provider-te aiawhte an tel a ni.