NICRA hnuaiah training buatsaih

Krishi Vigyan Kendra (KVK), Lawngtlai chuan April 8, Zirtawpni khan Chawnhu KVK training hall-ah National Initiatives on Climate Resilient Agriculture (NICRA) project hnuaia sik leh sa danglam zel mila kut hnathawktute hmalakna her rem chungchang inzirtirna an buatsaih.

NICRA project hi kum nga chhung kalpui tur niin, Lawngtlai district-a kalpui hmasak berna atan Chawnhu khua thlan a ni a, khaw dangah pawh hmalak chhoh zel tum a ni.

KVK Lawngtlai senior scientist Dr C Lalfakawma chuan, sik leh sa danglam zel chu kut hnathawktute'n an tawrh lutuk loh nan an hmalaknate an her rem a pawimawh tih a sawi a, "Sik leh sa mila kut hnathawktute an inher rem loh chuan harsatna nasa zawk tawh theih a nih avangin NICRA project hi kut hnathawktute hmakhua su êng tura kalpui tum a ni," a ti.

Training-ah hian Chawnhu VC president Lalhriatpuia'n NICRA project hnuaia custom hiring centre (CHC) din thar a hawng a ni.