'Mipui hnenah kal rawh' project kalpui

Lunglei district bawrhsap Kulothungan A hoin April 8, 2022 khan Thénhlûm khuaah 'Mipui hnenah kal rawh' (Go to the People) tih project hmangin a thlàwna inentirna buatsaih a ni a, lehkha pawimawh hrang hrang an siamsak nghal.

'Go to the People' project hi district mipui, a bikin thingtlang khaw kilkhâwr zawka chêngte tana buatsaih a ni a, sorkar department-te'n an khuaah an kalchilh ṭhin. Mipui mamawhte an chhawp hnaih bakah, sorkar scheme hrang hrang inzirtirna, thil dilna (application) thehluhte tihfel leh certificate siamsakte tih ṭhin a ni. Sorkar hnena an mamawh leh vei zawng thlen theihna hun an siamsak ṭhin bawk.

Thénhlûm khuaah hian SDC Lalsanglura, DC office-a thawk te, Health department, AH&Vety department leh Agriculture department bakah, bank leh Green Ag-te an kal. A thlâwna inentirna buatsaihin, a mamawhte tan damdawi leh tarmit an sem a, Covid-19 vaccine an pek bakah, ran entirna an buatsaih.

Bank loan leh scheme hrang hrang inzirtirna, Aadhaar-a inziah luh leh siamṭhat an ti a, tribal certificate, income certificate leh residential certificate-te an siamsak bawk.