Covid-19 positivity rate a sang leh

Mizoramah Covid-19 vei April 8, Zirtawpni khan mi 122 leh April 9, Inrinni khan mi 75 hmuh chhuah a ni a, sample endik zat aṭanga hripui vei hmuh zat (positivity rate) pung lehin, 20% aia sang a ni. Nimin leh Inrinni khan hripui vei dam tawh mi 185 chhuahtir an ni a, Covid-19 vei thi an awm lo.

Covid-19 vei April 8-a hmuhte chu mipa 54 leh hmeichhia 68 an ni a; RAT hmanga hmuh 120 leh FIA hmanga hmuh pahnih niin, positivity rate chu 22.89% a ni. April 9-a hmuh tharte chu mipa 39 leh hmeichhia 36 an ni a; RT-PCR hmanga hmuh pakhat, RAT hmanga hmuh 73 leh FIA hmanga hmuh pakhat niin, positivity rate chu 17.16% a ni.

Nimin khan hripui vei dam tawh mi 31 chhuahtir an ni a, Inrinni khan mi 154 chhuahtir an ni bawk.

IDSP record angin, Mizoramah Covid-19 vei 2,25,533 hmuh chhuah a ni tawh a, mipa 1,05,099 leh hmeichhia 1,20,434 an ni a, mipa aiin hmeichhia 15,335-in an tam zawk. Nimin tlai dar 5 thleng khan mi 2,24,100 (99.36%) chhuahtir an ni tawh a, mi 688 (0.31%) thi tawhin, enkawl mek mi 745 (0.33%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,25,533 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.