Mizoramah kum 2019 leh a hnu lamah Kângmei chhuakah mi 9 an kâng hlum

Kum 2019 aṭanga kumin March thla thleng khan Mizoramah mi pakua an kâng hlum a, kumin 2022 bikah mi pali an kâng hlum tawh. Fire and Emergency Services (FES) chuan kângmei lakah fimkhur turin Mizoram mipui an ngen.

FES chuan nimin khan an directorate conference hall-ah MJA member-te pualin 'Fire Safety and Fire Prevention' tih thupui hmangin zirhona an buatsaih a; zirhonaa tarlan danin, kum 2019 aṭanga March 2022 thleng khan Mizoramah domestic fire (in, hmun kâng) leh forest fire (ram kâng) ṭum 614 a thleng a, chu'ngah chuan mi pakua an kâng hlum a ni.

Kângmei ṭum 614 chhuakte chu domestice fire 178 leh ram kâng 436 a ni a; kum 2019 khan domestic fire 48 leh forest fire 82, a vaiin kângmei 130 a chhuak a, kum 2020-ah domestic fire 37 leh forest fire 131, a vaiin kângmei 168 a chhuak a, kum 2021-ah domestic fire 67 leh forest fire 199, a vaiin ṭum 266 a chhuak a, kum 2022-ah March 31 thlengin domestic fire 28 leh forest fire 24, a vaiin kângmei 52 a chhuak tawh bawk.

Kum 2019 khan kângmei chhuakah thi an awm lo a, kum 2020-ah mi pakhat thiin, mi pahnih an hliam. Kum 2021-ah mi pali thiin, mi pathum an hliam a; kuminah March 31 thlengin mi pali an thi tawh.

Khuallian C Lalnunkima, IPR director chuan, FES-te hahzia leh rimzia an hria a, indaih lo chung chunga theihtawp an chhuah ṭhin chu fakawm a tih thu sawiin, "Kan chhiat tawhna tam ber chu kângmei leh leimin a ni a, cheng vaibelchhe tam tak man a kâng chhe ṭhin. Hengte hi a vèn kawngah theihtawp kan chhuah a ngai," a ti a; sorkarin disaster fund atan department tinah sum a dah ṭhinte chu kângmei laka himna turin a nih dan tur ang taka hman a ngaia a hriat thu a sawi.

FES director C Lalthanmawia chuan, nikum 2021-ah ram kâng nasa tih sawiin, "IAF helicopter pun ngai hialin a awm a, kuminah erawh chuan ram kâng lian tham a la thleng lo, a lawmawm. Kângmei ven kawngah inzirtir nasat a ngai a, fimkhur nacháng mi tinin kan hriat a ngai; chu chuan kângmei vennaah nasa takin min pui dawn a ni," a ti.

MJA president C Lalrambuatsaiha pawhin thu sawiin, kângmei chungchangah zir tur tam tak an neih thu a sawi a, "Kan neih ang ang leh kan neih phâk bâk bâka kan in sakte rei lo te chhunga a kâng ṭhin hi a pawi a, thih phah an awm ṭhinte a pawi leh zual. Kangmei laka invenna lam kan ngaih pawimawh a ngai," a ti a; Mizote'n changkanna kawng zawha hma an sawn zelna turin kângmei vênna lam hi an ngaih pawimawh lehzual a ṭul thu a sawi.

Zirhonaah hian FES chuan thuthar thehdarhtute hnenah an hmanruate entirin, a hman dan an hrilhfiah nghal a ni.