Cheng vbc. 4.87 hu ruihhlo hal ral

Champhai District Police-te'n ni 24.05.2019 aṭanga 15.10.2021 chhunga ruihhlo an man khawm cheng vbc. 4.87 man hu chu nimin khan Champhai District Drugs Disposal Committee buatsaihin Champhai District Hospital incinerator-ah Law minister TJ Lalnuntluanga hoa hal ral a ni.

TJ Lalnuntluanga chuan sual dona kawnga hmalakna leh mipuite hnena inzirtirna pawimawh tak ruihhlo mante halralna hun buat­saih a ni chu lawmawm a tih thu sawiin, "Ram leh hnam himna tura ṭhahnemngai taka thawktu police, excise leh anmahni ṭawiawmtute an chhuanawm tak zet. Kan ram zimte leh mi cheng tlemte awmnaah hian harsatna midang tawh ang kan tawk ve tho a ni," a ti.

Ruihhlo avanga ram tluchhia leh hnam ral an awm tawh ṭhin thu sawiin Law Minister chuan, "Hnam dam nan leh dinchhuah nan ram leh hnam hmangaihna rilru pu chunga beihpui thlaka do let a ngai," a ti a, piantharna leh ram leh hnam hmangaihna thinlung tak tak nena ṭan tlan loh chuan ruihhlo do kawngah hlawhtlinna tluantling hmuh loh a hlauhawm thu a sawi.

Champhai DC James Lalrin­chhana chuan tunhnaiah ruihhlo tawlh leh man a zin thu sawiin, "Bengsika inngaihtuah chungin sikul, kohhran leh khawtlang huapin damdawi leh ruihhlo laka fihlim thei tur leh a nghawngte inzirtirna zau zawk neih a ṭul. Official, NGO, media leh mipuite ṭanhona hmangin kan district-in hma a sawn ngei ka ring tlat," a ti.

Thusawitu dang Champhai Sub-Hqrs. YMA president F Lalrinmuana chuan theihtawp chhuah a ni chunga ruihhlo man tur heti zat a awm leh a kalkawng atana ramri dep district-te hman a ni ṭhin chu vanduaithlak a tih thu a sawi.

Champhai SP Lalrinpuia Varte tarlan danin, Champhai District Police-ten January 2021 aṭanga April 11, 2022 chhungin heroin gram 8,448 leh methamphetamine mum 1,36,100 an man tawh.