Mipuiin Zoramthanga kaihhruai sorkar belhtlak leh rintlakah an ngai - Vanlalzawma

MNF chuan nimin khan Siaha-a Hnam Runah mithar lawmluhna hun leh MADC Election 2020 manifesto tlang­zarhna hun an buatsaih a, MNF vice presi­dent Vanlalzawma chuan Zoramthanga kaih­hruai sorkar chu mipuiin belhtlak leh rintlaka an ngaih thu a sawi.

MNF Vice President chuan an party-in Pathian hruainain kum 60-na an hman mek thu sawiin, "Sorkar chak tak leh ṭha tak kan din mek hi a lawmawm ka ti hle a ni. Zawmtu thar duhawm tak tak kan nei mek zel a. MZP president chhuak chiah leh zirlai leh ṭhalai hruaitu duhawm tak takin an rawn zawm mek zel," a ti.

Zoram pumah belh­tlak sorkar leh party-a ngaitu an awm mek zel hi a lawmawm tak zet tih sawiin Vanlalzawma chuan, "Seltute awm ve bawk ṭhin mah se, he Pu Zoram­thanga sorkar hi mipuiin belhtlak leh rintlak­ah an ngai a ni," a ti a, Mara ram hmasawnna atana hna­thawk tur pawhin Zoram­thanga a ṭhat ber thu a sawi.

MNF thuchhuah tarlan danin, inkhawmah hian an party-ah mi 505 lawmluh thar an ni a, an zingah hian K Riachho, IAS (Rtd.) leh ex MDC L Chhiesa te an tel.