Mizoram First-in airport tihchangtlunnaah dan bawhchhiatna awm ngeiah an ngai ; CM chhui chiang turin Lokayukta an ngen

Tunhnai pawl ding thar Mizoram First Movement (MFM) chuan Lengpui Airport tih­chang­tlun hna (contract) inpek chung­changah dan bawhchhiatna awm ngei nia hriain nimin khan Lokayukta ah a zualko a, a mawh­phurtu Chief Minister chu finance leh audit lama mi thiamte chhui chiantir ngei turin an ngen.

MFM chuan PWD changtu chief minister Zoramthanga chu a thuneihna hmang khaw lo leh chhungkhat laina duhsak uchuakah puhin, "India Danpui article 14 a bawhchhiat avang te, General Financial Rules (GFR) 2017-a rule 162-na leh Vigilance Commission thuchhuah hrang hrangte a bawhchhiat avangin, Prevention of Corruption Act, 1988 hnuaiah thubuai siamsak ngei tura ngenna Lokayukta-ah hian kan thlen a ni," an ti.

Lengpui Airport tihchangtlunna hnathawh hi Zoramchhana leh KR Construction (Kamrul Islam Laskar) te hnenah restricted tender hmanga pek a nih thu tarlangin MFM chuan, "He restricted tender hman a nih danah hian dan bawhchhiatna a awm ngei niin kan hria," an ti a, General Financial Rules 2017 leh The Mizoram Public Procurement Rules, 2020 in a sawi dan chuan cheng nuai 25 chin chung lama restricted tender ko tur chuan chhan mumal tak awm tur a nih thu an tarlang.

MFM tarlan danin, restricted tender ko tura chhan mumal taka ngaih turte chu - tum reng emaw hriatlawk loha thil hmanhmawh­thlak tak thawh a ṭulin, a pangngaia tender koh (open/advertised tender) aia insenso tam chuang lo tur a nihin, thil lei tur a nih chuan, a supply tu tur lo kalna tur hriatchian sa leh anni bak ti thei tur dang an awm lohin a ni.

Tin, restricted tender hman a nih dawn chuan hman ngei a ṭul chhan chiang takin ziak a awm tur a ni a, restricted tender chhang turin mi pathum aia tam an awm ngei tur a ni bawk.

Hetiang a nih lai hian Lengpui Airport tihchangtlunna hna atan restricted tender chhang turin mi pathum chauh koh/sawm an ni. PWD lam chuan a hna hi mi nazawng thawh theih loh, hmanrua bik ngai (specialised equipment) leh thawh zawh thuai ngai a nih avanga restricted tender hmang angin an insawi.

Lengpui Airport-ah hian ni khatah thlawhna pathum bak a ṭum ngai lova, passenger 700-900 vel chauhin an hmang tlangpui bawk a, chei ṭhat hi a hmanhmawhthlak em emna tur a awm lo. Contractor thlan tak, Zoramchhana leh KR Construction-te hian hmanrua emaw, khawl bik an nei tih chianna engmah hmuh tur a awm lo. Hei hi airport-a an hnathawh lai, an zawh hma hmaa a chim aṭang pawhin a chiang hle.

MFM chuan dan bawhchhiatna leh, dan palzama mi hmai eng pawh zah loa induhsakna uchuak (nepotism) chu Mizoram leh hnam zah lohna anih avangin an dodal thu an tarlang a, "Hetiang thiltih hi Mizo hnam tan thil zahthlak leh tlawmthlak tak a nih avangin Mizote zahawmna humhima, dan rorelna tungding leh turin leh, dan palzamna leh corruption do turin Zofate zawng zawng a sawm a ni," a ti.

MFM-ah hian president chu Lalnunmawia Chuaungo, IAS (Rtd.) niin, hruaitu dangte chu - vice president Lalnunkunga Sailo leh Vanramchhuangi, general secretary Dr Rohmingmawii te an ni.