KHAWTHLIR

Ruihhlo zirho
Mizoram Social Defence & Rehabilitation Board (SLCA), Social Welfare & Tribal Affairs Department, Government of Mizoram leh National Institute of Social Defence, Ministry of Social Justice & Empowerment, Government of India ṭangkawp chuan nimin khan Govt. Hrangbana College-ah ‘One Day Awareness Generation on Drug Abuse Prevention' an buatsaih a, college zirlai 150 vel leh zirtirtu eng emaw zat an tel.

Chawlh puang
Negotiable Instruments Act, 1881 hnuaia section 25-na in thuneihna a pek tlawhchhanin Governor chuan sorkar hnathawk (central/state/public sector undertakings/financial institutions/educational institutions) Mara Autonomous District Council Inthlanpui, 2022 a vote thlak turte tan May 5, 2022 (Ningani) hi chawlh atan a puang.

Sikul building MLA-in hawng
Lengteng bialtu MLA L Thangmawia chuan nimin khan NABARD sum cheng nuai Rs. 7.5 leh MLA fund cheng nuai 7.5 senga sak thar Govt. Primary School building, Pawlrang a hawng. L Thangmawia chuan building hawn thar chu cheng nuai 15 a sakah chuan Mizoram pumah a ṭha ber a nih a rin thu a sawi a, zirtirtu leh zirlaite hnenah sikul thar lawmpui nan computer leh printer set 1 a pe nghal.

SBM sawiho
UDPA department hnuaia Swachh Bharat Mission (Urban) thawhkhatna chu a zawh tawh avangin Swachh Bharat Mission (Urban) 2.0 kalpui ṭan a ni dawn. Hemi atana din State Level Technical Committee (SLTC) on Swachh Bharat Mission (Urban) 2.0 chu nimin khan UDPA secretary K Lalthawmmawia hoin an ṭhukhawm a, Swachh Bharat Mission (Urban) 2.0 Mizorama kalpui zui zel dan tur an sawiho.

Heroin man
Zokhawthar Police Team-te chuan ni 10.4.2022, Pathianni khan Zokhawtharah Lalnunsiami (33), Myanmar kut aṭangin heroin nia rinhlelh gram 52 an man.