Aizawl tih hmasawn zel kan tum - Aizawl Mayor

Aizawl mayor Lalrinenga Sailo chuan Aizawl khawpui hmasawnna atan theihtawp an chhuah zel thu sawiin, "Aizawl khawpui hi tih hmasawn zel kan tum a ni," a ti.

Lalrinenga Sailo chuan AMC chu kum 10 kalta-a Aizawl khawpui danglamna siamtu an nih thu sawiin, "Tuirial Dumping Ground-a bawlhhlawh kan chhun ruih ruih kha solid waste management fel tak siamin kan kalpui tawh. Bawlhhhlawh haitu mi 165-te chu ID felfai tak kan siamsak," a ti a, bottle chhia, lehkha, plastic, dar leh thir chhiate felfai takin an thliar tawh thu a sawi.

Bawlhhlawh haitute chu cement company lamah an hralhsak ṭhin thu sawiin Aizawl Mayor chuan, "Chu'ng aṭang chuan royalty kan la zel a, ni 20 kalta chhung khan royalty cheng 40,000 kan la a ni," a ti.

Aizawl Mayor chuan kum 2021-2022 khan property tax aṭangin cheng vbc. 3 an hmuh thu sawiin, "AMC-in intodelh kuma kan puan angin kumin chuan cheng vbc. 4 - 5 vel hmuh kan inbeisei a ni. AMC hian Municipal lian budget cheng vbc 10000 neite ang tho khuan ṭan kan la," a ti a, Aizawl khawpui hi tihhmasawn zel an tum thu a sawi.

Lalrinenga Sailo chuan Covid-19 avangin AMC-ah pawh sum a harsat thu sawiin, "15th Finance Commission aṭanga pawisa hmuh ṭhin cheng vbc. 54 aṭangin cheng vbc. 34-ah a tla hniam a ni. Municipality hi chu intodelh tura din kan ni a, performance fund cheng vbc. 22 pawh Covid-19 vangin nikumah a tawp tawh," a ti.

Kumina AMC budget an pharh chu cheng vbc. 65 chauh a nih thu sawiin, "AMC-ah hian thawktu a nghet lote nen mi 200 chuang an awm a, local council 83 awmah member 708 hlawh kan pe a ni. Bawlhlawh paih ṭhintu motor 150 vel paihna man kan pe a, streetlight tih en nan te, tuihawk luan kawr leh development tenau thawh nante thlengin kan hmang," a ti a, budget 75% chu hnathawhna atan an hman thu a sawi.