Hmànlaia inphùmna hlum bél leh a chhunga ruhro lài chhuak

ICFAI University-a Department of History, Mizoram Art & Culture department leh Mizo Archaeological Society (MAS) chuan April 1-7, 2022 chhung khan Ailawngah hmânlai inphùmna hlum bél chhunga puitling ruhro nia ngaih an lai chhuak.

Hlum bél laih chhuah hi kum 2018 khan PHE department-in pipe an phûmna lamah an hâi chhuak tawh a, mahse, an vûr leh nghal a ni.

Chumi chungchang chu an hriat hnuah ICFAI University-a History department chuan zir chian (scientific study) atan an bawhzui a, sorkar lam leh MAS-te nen ṭang rualin an lai chhuak leh a ni.

ICFAI University chuan, mumal taka thil hlui hâi chhuah (archaeological excavation) hmanga hmànlai thil zirna chu history zirna kawng pawimawh tak pakhat a nih thu an tarlang. Ailawng rama hlum bél leh ruhro an laih chhuah pawh zir chian chhunzawm turin hmun hrang hrangah thawn an tum a ni.