NABARD sum hmanga sikul thuamṭhat hna hralh chhawn vanga nihdan tur ni loah ngai

Nimin khan Bilkhawthlir MSU hruaitute leh Kolasiba thuthar thehdarhtu ṭhenkhatten Bilkhawthlir khua a NABARD sum hmanga sikul thuamṭhat pahnih an tlawh a, hna hi hralh chhawn ve ve a nih avangin a nihdan tur ni loin an hria.

MSU leh Kolasib a thuthar lakhawmtute chuan Govt. T Robert High School an tlawh hmasa a, Govt. T.Robert High School thuamṭhat hna (renovate) tur hi Allied Concern, Dawrpui Canteen Kual ami niin, inremna lehkhaah chuan first party hian GST 12% leh labour cess 1% chu first party pek tur a ni.

Govt. T Robert High School hi sanction pangngai chu cheng nuai 8 a ni a, cut ngai cut a nih hnuah hnathawktu tur hi Rs 6,01,135 a thawk tura tih a ni.

A hmuna lo awm Bilkhawthlir Block MNF hruaitute chuan hnathawk turin an party mi leh sa pahnih thlan an nih thu an sawi a, anni hian Rs. 2,31,135 in Govt. T Robert HS Manging Board hnenah an hralh a, a thawhna tur Rs 3,70,000 la awm hmangin hna hi thawh a ni ta a ni. Agreement lamah hnathawh tur sawi a awm lo.

Kharzawl SSA NABARD sum hmanga thuamṭhat pawh Bilkhawthlir MSU leh thuthar thehdarhtute hian an tlawh a ni. He hna hi sanction amount cheng nuai 10 a ni a, hna hmutu hi Allied Concern, Dawrpui Canteen Kual bawk an ni. GST leh labour cess bakah cut ngai an cut hnuah hnathawhna tur hi Rs. 7,51,420 a ni a, hna hi Malsawmzuala, Durtlang, Aizawl hnenah pek a ni.

Malsawmzuala hian Bilkhawthlir Group MNF president, Lalchhuanawma hnenah cheng nuai 2.5 in a hralh a, ani hian Rs. 5,01,420 hmangin hna hi a thawk a ni. Hnathawh tur hi Kharzawl sikul a thawkte’n ṭha an tih zawng an sawi a, a thawktu hian a pawisa mil tawk nia a hriatin a thawk ta a ni.