MZP-in Hindi zir ngei ngei tura tih duh lo

MZP chuan thuch-huah siamin, April 7, 2022-a BJP hruaitu Amit Shah-in ‘Hindi ṭawng chu hmarchhak state pariatah zir ngei ngei tura duan a ni dawn,’ tia a sawi chu ṭha an tih loh thu an tarlang.

Hmarchhak state hrang hrangah mahni state hnam ṭawng hman a nih thu tarlangin MZP chuan, “Mahni pianpui ṭawng hmang tura nasa taka hmalak a nih mek laia hetiang hmalakna a awm hi hriatthiam har kan ti hle. Hindi compulsory-a hman a nih chuan hnambil ṭawng leh pianpui ṭawng nasa taka a khawih dal theih dawn bakah zirlaite tân phurrit a ni theih dawn a ni,” an ti.

MZP chuan Hindi ṭawng compulsory subject-a dah loin, a hmaa kalphung pangngai hman chhunzawm a nih theih nan hmalak zel an tum tih tarlangin, “He thil hi BJP in RSS chang vawn ram pakhat, ṭawng pakhat, sakhua pakhat tih puitlinna tura an hmalakna leh ram leilung fate nuai bo tumnaah kan ngai,” a ti a, hemi chungchanga NESO hmalakna chu a thlawp zel dawn thu an tarlang.