Kalphung thar tih hi pawl sawn tam tihna a ni ber - MNF Treasurer

MNF treasurer K Vanlalauva chuan nimin khan Hnam Runah thu sawiin, “Kalphung thar tih hi pawl sawn tam tihna a ni ber. A sawi tur bera ngaih Pu Sapdanga hi Pu Duhoma’n a sawi khalh zel,” a ti.

K Vanlalauva chuan kum hnih zet hripuiin min chenchilh chung pawhin buhfai, gas leh mamawh zualpui kan nghei lo nia sawiin, “Kan hotute thawhrah a ni. Chuti chungin eptu lamte chuan chhe lailet der angin min chhuah a, kan Chief Minister zahawm tak pawh an bei nasa thei hle a ni,” a ti a, beihna karah MZP hruaitute leh chhim lam thlengin an party-ah an luh ruih ruih thu a sawi.

An party-a lut tharte chuan party kal tawh leh sorkar kal tawh an hmuin, an thlir vek tih sawiin MNF Treasurer chuan, “Tun sorkar tluka mipui tana hnathawk ṭha an hmu lo. He sorkar hian double lane thlengin kan khawih mawlh mawlh a, kan party-te hian kan hmalakna tam tak hi kan sawi kan sawi ve lo zawk a ni. Min chirh theh mawlh mawlh karah awmze neiin kan sorkar hi a kal zel a ni,” a ti.

MNF Treasurer chuan kalphung thar tih sawi awm ber chu K Sapdanga a nih thu sawiin, “Pu Duhoma’n a sawi khalh zel mai si a nih hi,” a ti a, kalphung thar ber chu pawl sawn tam a ni ber thu a sawi.