Lungleiah MCS post 20 awmah Officer pakua chiah dah an ni - LDCC President

Lunglei District Congress Committee (LDCC) president C Lalhmingliana chuan Lungleiah MCS officer 20 awm turah office pakua chiah an awm thu a sawi.

Nimina Lunglei Congress Bhavan-a inkhawmah thu sawiin C Lalhmingliana chuan, “Lunglei district mipuite hi he sorkar hian min hlamchhiah ta hle niin ka hria. MCS officer-te pawh hna an kawp tir vak vak a, mipui anmahni dawrtute tan chuan hun leh tha, sum tam tak paih ral a ngaih phah leh dawn. Khawi office zawkah nge an dawr tur MCS officer chu a thut dawn ti a buai reng a ngai ang,” a ti.

LDCC President sawi danin, addl DC mi pahnih awm turah pakhat awmin, SDC post pathum awm chu MCS officer 1 kawp tir vek a ni dawn. SDO(S) chuan election officer leh printing & stationery a kawp dawn a, DCSO pawh DLAO nen kawp tir niin, a kawptu hian thla ruk chhung vel leave a la leh dawna sawi a ni.