Lunglei SEDP committee an ṭhukhawm

Lunglei District Socio Economic Development Policy (SEDP) committee chu nimin khan an chairman DC Kulothungan A hoin DC conference hall-ah a ṭum khatna atan an ṭhukhawm.

Kulothungan A chuan SEDP chu ram leh hnam hmasawnna tura sorkar flagship policy a nih angin Line department-te leh member-te’n theihtawp chhuah tlanga, Lunglei district-ah ṭha taka kalpui anih ngei theihnan theihtawp chhuah ṭheuh turin a chah a, “District ti hmasawn tura mawhphurhna fawng vuantute in nih angin in hma zawn ṭheuha tih tur awmte uluk leh taima takin thawk chhunzawm zel ang che u,” a ti.

Meeting-ah hian Lunglei district-a SEDP kalpui dan tur tlangpui te, district SEDP Committee mawhphurna hrang hrangte leh Line department-te hmalakna kal mek leh hmachhawpte sawiho a ni. Village Level SEDP Committee din dan tur pawh sawiho niin, Lunglei addl. DC K Lalrohlua chairman na hnuaiah constituency tin aiawhte nen tun thla chhung ngeia ti fel tura thutlukna siam a ni.

Meeting-a tarlan a nih danin, tun dinhmunah Lunglei district-ah Line department pathum hnuaiah SEDP hmalakna a awm tawh. Agriculture dept. hnuaiah vaimim ching tur beneficiary 1665 thlan fel tawh an ni a, vaimim chi quintal 313.4 quintals sem tawh niin, sem chhunzawm zel turin ruahmanna siam a ni.

Fisheries department hnuaiah sangha chi nuai 4 sem tawh a ni a, Horticulture department hnuaiah mau ching tur chhungkaw 180 thlan tawh a ni bawk a, hmunhma turte vah leh hal fel tawh a ni.