Covid-19 positivity rate a pung

April 10, Pathianni khan Mizoramah Covid-19 vei mi 50 hmuh chhuah a ni a, positivity rate 35.21% niin, nasa takin a pung. Nimin khan hripui vei dam tawh mi 115 chhuahtir an ni a, Covid-19 vei mi pakhat a thi.

Covid-19 vei April 10-a hmuh mi 50-te chu mipa 16 leh hmeichhia 34 an ni a; TrueNAT hmanga hmuh pakhat leh RAT hmanga hmuh 49 an ni. RT-PCR leh FIA hmangin swab sample endik a ni lo. IDSP record angin, Mizoramah Covid-19 vei 2,25,583 hmuh chhuah a ni tawh a, mipa 1,05,215 leh hmeichhia 1,20,468 an ni.

Nimin tlai dar 5 thleng khan mi 2,24,215 (99.39%) chhuahtir an ni tawh a, mi 689 (0.31%) thi tawhin, enkawl mek mi 679 (0.30%) an awm. Kum 2011 chhiarpui aṭanga chhutin Mizorama Covid-19 vei hmuh tawh 2,25,583 chu mi 1,000 zelah hripui vei mi 205 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.

April 10-a India rama Covid-19 positive hmuh tam lamah Mizoram chu India rama state leh union territory 36 zingah pangana a ni a; Mizoramah mi 50 hmuh chhuah a nih laiin, Kerala-ah mi 347, Delhi-ah 160, Maharashtra-ah 132 leh Haryana-ah mi 87 hmuh a ni. Hmarchhak state pariat zingah Mizoram leh Manipur-ah chiah Covid-19 vei hmuh thar a ni a, Manipur-ah mi pathum hmuh niin, state dang parukah hmuh chhuah a ni lo.