December 15-ah sorkar lak luh a ni dawn

MNF Legislature Party hruaitute chuan nimin tlai dar 6 khan Raj Bhavan-ah Governor Kummanam Rajasekharan an hmu a, sorkar an siam theih thu an hrilh nawn. Governor chuan, MNF hruaitute thu thlen chu a lo pawmsak a, December 15, Inrinni-ah sorkar thar la lut turin ruahmanna a siam.

MNF Legislature Party-te chuan an chair­man Zoramthanga hoin Thawhlehni zan khan Governor hi an hmu tawh a, sorkar an siam theih thu an hrilh.

Hemi ṭum hian Gover-nor chuan, Election Commi-ssion of India aṭanga lehkha a la hmuh loh avangin sorkarna siam tura a la sàwm theih loh thu leh ECI aṭanga lehkha a hmuh hunah MNF-te hi sorkarna siam tura a hmuh tur thu a lo hrilh a ni.

Nizan khan MNF Legislature Party-te chuan Governor hnenah sorkarna siam tura sâwm turin an ngen leh a; Governor chuan ECI aṭanga lehkha a hmuh tawh avangin MNF-te'n sorkarna siam tura sàwm tura an ngenna chu a pawmsak ta a ni.

MNF Legislature Party-te hian Thawhlehni tlai khan MNF Legislature Party dinin, leader atan Zoramthanga, party president an thlang a, deputy leader atan Tawnluia leh secretary atan Lalruatkima-te an thlang.

Ruahmanna siam dan chuan, Governor-in MNF kaihhruai sorkara Chief Minister leh minister turte chu December 15 khian Raj Bhavan-ah rinawmna thu tiamtirin a la lut ang.

Tarlan tawh angin, November 28-a Mizoram Assembly inthlanna neih zawh taka vote tlate chu Thawh­lehni khan chhiar a ni a, bial 40-ah MNF-in bial 26-ah hnehna an chang a, sorkarna an siam thei a ni.