Councillor pahnih MLA-ah an tling

Mizoram Legislative Assembly inthlan neih zawh takah khan, Aizawl Municipal Corporation (AMC)-a councillor ni mek zinga panga chu candidate an ni a, mi pahnih thlan tlin an ni. District council-a member (MDC) ni lai pakhat thlan tlin a ni bawk.

AMC councillor 19 zingah MNF-in councillor pathum leh Congress party leh ZPM-in councillor pakhat ve ve MLA candidate atan an dah a; chu'ngte chu - Aizawl North-I bialah deputy mayor Lalringliana (MNF), Aizawl North-II bialah Latlanzova Khiangte (MNF), Aizawl North-III bialah C Lalmuanpuia, Ṭawiah Rosiamngheta (INC) leh Aizawl South-I bialah C Lalsawivunga (ZPM)-te an ni. An zinga pahnih - C Lalmuanpuia leh C Lalsawivunga te chu MLA atan an tling.

Tun dinhmunah AMC-ah hian MNF-in councillor 11 neiin sorkarna an siam a, AMC inthlana thawk dun Congress party leh MPC-in seat pariat (Congress 7 leh MPC 1) an nei a ni.

Vanglaini palai zawhna chhangin AMC commissioner Dr H Lalthlangliana chuan, AMC councillor MLA atana thlan tlinte chuan MLA result puan aṭanga ni sarih chhungin MLA nge, AMC councillor an nih dawn tih AMC Commissioner hnenah an hriattir tur a nih thu a sawi a, "Keini lam chuan councillor-te duhthlanna hi State Election Commission-ah kan thawn ang a, thutlukna pawh anmahni siam tur a ni," a ti.

Hetihlai hian, Mizoram chhim lama autonomous district council (ADC) pathuma member (MDC) ni lai zinga pakhat, H Lalbiakzauva, Lai ADC-a MDC chu Lawngtlai East bialah MNF party candidate a ni a; he biala MLA ni lai H Zothangliana chu hnehin MLA atan thlan tlin a ni.