KHAWTHLIR

Calendar tlangzarh
Mizoram ENVIS Hub leh Association for Environmental Preservation (ASEP)-te'n kum 2019 calendar an siam chu nimin khan Mizoram Pollution Control Board (MPCB) member secretary C Lalduhawma’n MPCB-ah a tlangzarh. C Lalduhawma chuan, environmental NGO-te leh sorkar department-te thawhho ṭhat a pawimawh thu a sawi. Calendar hi ASEP office, Upper Khatlaah Rs. 150-in lei theih a ni.

ZPM MLA hruaitu
Zoram Peoples' Movement (ZPM) aṭanga MLA atana thlan tlin mi pariatte chuan nimin khan ZPM pisaah ZPM Legislature Party an din a; leader atan Lalduhoma, deputy leader atan Vanlalhlana leh secretary-ah Dr Vanlalthlana te an thlang.

Duhkhawp lo
Mizoram Truck Owners' Association (MTOA) chuan nimin khan Aijal Club-ah inkhawmpui an hmang a, heavy vehicle driving license lak a harsat chungchanga sorkar an dawr thu leh kawng chhia chungchanga sorkar hmalakna an duhkhawp loh thu an tarlang. Inkhawmpuiah hian MTOA hruaitu thar tur thlan a ni a, president-ah Vanlalduata leh gen. secretary-ah Dina Tlau te thlan an ni.

PAMRA lawm
PAMRA chuan thuchhuah siamin, Mizoram inthlanpuia member thlan tharte thinlung taka an lawmpui thu an tarlang a, ram rawngbawl turin duhsakna an hlan. Kum 1986-a inremna vanga ram mutna aṭanga an hawpuite - Zoramthanga, Tawnluia leh Lalrintluanga Sailo-te chu thlan tlin an nih avanga an lawm thu sawiin, "Thinlung takin kan lawm a, he dinhmun a dahtu Pathian leh Zoram mipui chungah lawmthu kan sawi a ni," an ti.