Inthlan leh atan ṭan lak nghal a pawimawh - Lalduhoma
Zoram Peoples' Movement (ZPM) leader Lalduhoma chuan a, inthlan leh atan hmalak ṭan nghal a pawimawh tih a sawi.
Lalduhoma hian nimin khan an pisaa inkhawmah thu sawiin, ZPM aṭanga MLA atana thlan tlinte chu rim taka hna thawk tur leh mipuite rawngbawl tur an ni tih inhre tura a duh thu a sawi a, "Opposition lian ber kan ni dawn a, theihtawpin hma kan la ang. Session atante hian uluk taka inbuatsaih tur a ni a, engkim zir theih a ni a, chumi atan chuan theihtawp kan chhuah ang. Tunah chuan opposition turin Pathianin min dah a, lawm taka pawm a, opposition ṭha tak nih tum tur a ni. Party pakhatah kan awm tawh law law turah kei chuan ka ngai," a ti.
MNF sorkar chu mipuiin an ning leh thuai dawn tih sawiin intiamkamna an ngah avangin, "Chief Minister tur hi ka khawngaih lâwk," a ti.
Duhoma chuan, "Tuna sorkarna siam turte hi a hmaa mite tho kha an ni a, kum khat velah chuan mipuiin kan ning leh tawh ang. An Chief Minister tur hi ka khawngaih lâwk, traffic jam awm lohnaa awm hi Aizawl mipuiin an nghakhlel dawn hle a ni. Aizawl East-I ṭhalaite police-a lak ṭeuh an ngai dawn a, in hmun nei lote pawh pek vek an ngai dawn a ni," a ti a; Mizoram CM tur chuan a intiam anga Tuirial khua/vengah college a din a ngai dawn bawk tih a sawi.
MNF-te'n sum an ngah thu sawiin Lalduhoma chuan, "Miin sum an dawn tawh rau rau chuan sum petute vote loh an hreh ṭhin. Sum a hluar a, a bik takin MNF-in an uar. MNF candidate-te khan sum an nei vek a, NEDA an zawm zár an zona a lang. Last minute-ah pawh sorkar lai Congress pawhin sum neihah an pha lo. Keini chuan sum sem tur kan nei lo a, nei mah ila sem pawh kan duh lo," a ti.
ZPM Leader chuan, an beisei anga an chet ṭhat loh chhan nia a hriat sawiin, "Bul kan ṭan tlai vang a ni. Kan pian tlai tawh nâk a laiin pawl pakhat ni lo ta chu, thu pawhthlak zung zung a harsa a, candidate tur pawh kan final har a ni. A dang lehah chuan kalphung thar zawm mah ila, mipuiin kalphung hluiin vote an thlak. Thâwm kan ti lian tâwk thiam lo a, mipuiin Congress sorkar an ning tawh a, a paihthla thei tura an ngaih MNF ṭha an tih vang pawh ni loin an vote a ni," a ti.