ZoRO-in MNF sorkar an beisei sang

Zo Re-unification Organisation (ZoRO) Mizoram inthlanpuiah MNF-in hnehna changa sorkar an siam tur chu an lawmpui thu tarlangin, Mizoram hmasawnna atan chak taka hma la turin duhsakna an hlan a; MNF Manifesto-a Political No. 1 chu MNF sorkarin an tihpuitlin ngei an beisei thu an sawi.

ZoRO chuan, MNF Election Manifesto-a Political No. 1-ah chuan, 'UN Declaration on the Rights of Indigenous Peoples (UNDRIP) 2007 behchhana Zo fate ram hrang hranga ṭhendarha awm te, thuneihna sang zawk neia rorelna pakhat hnuaia awm khawm tur­in hmalak a ni ang,' tih an dah chuan ZoRO a tilâwm hle tih a sawi a, "Mizorama sorkarna an chan tak avangin chak zawkin ZoRO nen thawkhoa hmalak a ni thei tur hi a lawmawm a, Zo fate tan hma thar a rawn inhawng dawn niin kan hria a, beiseina sang tak nen kan thlir reng a ni," an ti.