Ruihhlo do chungchang sawiho

Nimin khan Secretariat conference hall-ah ruihhlo do chungchanga inràwnkhawmna, 'Consultative meeting on Drug Prevention Module for

Mizoram' neih a ni. An hun hmanpuitu, Social Welfare secretary K Vanlalrawni chuan, ruihhlo dona kawnga hlawhtling tur chuan kohhran, tlawmngai pawlte leh mipui thawhho ṭhat a ngaih thu a sawi.

Mizoram Social Defence & Rehabilitation Board (MSDRB) chief executive officer Lal­hlupuii Sailo chuan, naupang leh ṭhalaite tana ruihhlo dona leh ruihhlo laka venhimna module duan a nih thu sawiin, "Module duan tawh hi mithiam tak tak nen inràwnkhawmna hun hrang hrang neih a nih hnuah NIMHANS, Bangalore-ah thawn a ni dawn a, chumi hnuah chuan kalpui ṭan a ni ang. Master trainer atan kohhran mi leh sa te, khawtlanga mi ṭangkai tak takte leh zirtirtute hman tum a ni," a ti.

MSDRB facilitator Vanlalhruaii chuan, 'Drugs Intervention Prevention in Mizoram' tih thupui hmangin Social Welfare department-in zirchianna a neih tawha ṭhalaite'n ruihhlo an khawih ṭan hun te, ruih­hlo hrang hrang an khawih chhoh dante leh chumi hriatna hmanga venhimna kalpui dan turte a sawi a ni.