Congress party-in MNF an lawmpui

Congress party-a office bearer-te nimina ṭhukhawm chuan resolution an pass a; Mizoram inthlanpui muan­awm leh felfai taka zawh fel a ni chu lawmawm an tih thu leh, sorkar siam theia chak MNF party an lawmpui thu an tarlang.

Mizoram Pradesh Congress Committee (MPCC) OB meeting chuan, "Theihtawpa party-in kan thawhna leh hmalaknate a lawmawm a, thlan tlin zawng zawngte kan lawmpui a. Sor­karna siam theia MNF-in hnehna a chang hi MPCC chuan kan lawmpui a, chutih rualin, party hrang hrang candidate tling zo lote pawh kan tawrhpui tak zet a ni," an ti.

Inthlana theih tawp chhuaha thâ leh zung sengtu Congress party worker zawng zawng chungah MPCC chuan lawmthu an sawi a; inthlan dawn hnaihah inthlan tibuai thei leh inthlan hun sawn ngai hial tur khawpa lang buaina a awm laia 'Hnam hnatlang” hlawhtling taka tlawmngai pawlte'n an buatsaih thei chu lawmawm an tih thu leh kohhran mipui ṭawngṭaina leh mipui ṭanrual vanga an ngaih thu an tarlang.

Congress party chuan, Mizoram mipuite chu kum 2018 Krismas leh 2019 kum thar lo thleng tur hlim taka hmang turin duhsakna an hlan a; Congress sorkar chhunga mimal emaw pawl emaw tu pawh Congress party-in an rilru a tihnat leh hliamte an awm a nih chuan chung mite hnenah chuan thinlung takin ngaihdam an dil tih an tarlang bawk.