Seat 26 lain MNF-in hnehna an chang

Mizoram State Legislative Assembly pariatna atana general election-a vote tlate chu nimin khan district khawpui tinah chhiar a ni a; MNF party-in seat 26 lain, hnehna an chang a, sorkar lai Congress party chuan seat panga chiah an la thung.

Assembly general election vote chhiar hi zing dar 8-ah ṭan a ni a, district pariata coun­ting centre 13-ah Assembly constituency 40 tan counting hall 40 leh counting table 347-ah chhiar a ni.

Vote chhiar ṭannaah postal ballot chhiar hmasak a ni a, postal ballot 40-te chu mi 160-in an chhiar. Zing dar 8:30-ah electronic voting machine (EVM)-a vote tlate chhiar ṭan a ni a, counting table 347-ah mi 1,041-in an chhiar a ni.

Mizoram inthlanpuiah hian seat awm 40 zinga 26 chu MNF party-in an chang a, Zoram Peo­ples' Movement (ZPM)-in seat pariat, Congress party-in seat panga leh BJP-in seat pakhat an chang.

ZPM chief ministerrial candidate Lalduhoma chu Aizawl West-I leh Serchhip bialah a tling a, bial pahniha tling kawp awm chhun a ni.

Inhnehna sang ber chu Aizawl West-III-a MNF candidate Lalruatkima'n INC candidate Dr Lalmalsawma a hnehna vote 2720 a ni a; inhnehna tlem ber chu Tuivawl constituency niin, MNF candidate Lalchhandama Ralte chuan INC candidate RL Pianmawia chu vote 3-in a hneh.

Chief minister ni lai leh Congress party president Lal Thanhawla chu constituency pahnih - Serchhip leh Champhai South-ah ding kawp mah se, a chak lo ve ve a; Serchhip bialah hian ZPM leader Lalduhoma a hneh lo a, Champhai South-ah pathumna niin MNF candidate TJ Lalnuntluanga leh ZPM candidate C Lalremliana-te a phak lo.

Congress kaihhruai sorkar term kal laia minister, tun inthlana candidate ni leh zingah Zodintluanga (Thorang bial) leh C Ngunlianchunga (Lawngtlai West)-te chiah an tling a; minister dang - Lalsawta (Aizawl East-II), H Rohluna (Lengteng), John Rotluangliana (Mamit), PC Lalthanliana (Lunglei North), Lal Thanzara (Aizawl North-III), KS Thanga (Aizawl South-III) leh Vanlalawmpuii Chawngthu (Hrangturzo)-te chu an bial ngaiah ding lehin an tling zo lo thung.

Congress MLA ni lai, an party candidate ni lehte zingah - Lalrobiaka (Dampa), Dr Ngur­dingliana (Kolasib), RL Pianmawia (Tuivawl), R Vanlalvena (Aizawl South-I), Lt. Col. ZS Zuala (Aizawl South-II), TT Zothan­sanga (Champhai North), T Sangkunga (East Tuipui), John Siamkunga (South Tuipui), Joseph Lalhimpuia (Lunglei East), Chalro­sanga Ralte (Lunglei West) leh H Zothangliana (Lawngtlai East) te an tling zo lo.

MNF MLA ni lai zingah chuan Vanlal­zawma (Aizawl West-III) leh K Sangṭhuama (Aizawl West-I)-te an tling zo lo.

Champhai district-a bial panga chu MNF-in an la vek a, Congress party-in Aizawl district-ah bial lak an nei lo a, MNF (8) leh ZPM (6)-in an insem. Sorkar lai INC chuan Kolasib leh Serchhip district-ah seat lak an nei lo bawk a; MNF-in seat lak lohna district an nei lo.