Zu khap leh kawng siam hna hmasaah kan nei ang - Zoramthanga

MNF president Zoram­thanga chuan, sorkarna an siam hunah zu zawrh tihtawp leh kawng siam chu hna hmasaa an neih tur thu a sawi a, "Hmasawnna lam chu SEDP hmangin kan thawk dawn a ni," a ti.

Nimina vote chhiar zawha Vanglaini palai zawhna chhangin Zoram­thanga chuan, "Hna hma­saa kan neih tur chu zu, hripui ang maia mipui tam tak min suattu hi kan khap ang a, a dawt lehah chuan kawng chhe lutuk, kan kawng ICU-ah a awm tawh anga an sawi hial ṭhin siamṭhat hna hi kan thawk ang," a ti a; hmasawnna hna chu an policy neih sa SEDP hmanga an thawh nghal tur thu a sawi.

MNF President chuan an tlin chhana a hriat zawhna chhangin, "Mipuite'n kan flagship prog­ramme SEDP-te ṭha an ti a, Congress sorkar an ning tawh bawk si a, min vote tling a ni mai. Pathian leh mipui zarah liau liau sorkarna siam thei kan ni a, kan sorkar theihna atana theihtawp chhuahtu zawng zawngte hnenah lawm­thu kan sawi tak meuh meuh a ni," a ti.

Zoramthanga chuan, sorkar an siam hmasak ai chuan hna an thawh ṭhat zawk tur thu sawiin, "Kum 10 kan opposition chhungin thil engkim kan ruahman sa vek a ni," a ti a; an party flagship programme neih sa an ṭan nghal vat tur thu a sawi.

Seat an lak zat chu a beisei ang zat vel a nih thu sawiin MNF President chuan, "A tirah seat 25-30 inkar kan neih tur thu leh Congress party under 10-ah kan dah ang kan ti a, a thleng dik a ni. Kan party leader tur chu MNF MLA rualte'n an la thlang dawn a ni," a ti.