KHAWTHLIR

Chief Minister-in Bânna thehlut
Mizoram chief minister Lal Thanhawla chuan a kaihhruai Congress party chu Assembly inthlanah an chak loh avang leh amah pawh a tlin zawh loh avangin nimin tlai dar 5 khan Governor Kumanam Rajashekharan hnenah chief minister aṭanga bânna a thehlut. Lal Thanhawla hi banna a thehluh pahin rei lo tê Governor nen an inkâwm a, chumi hnuah Raj Bhavan a chhuahsan leh nghal a ni.

MNF hruaitu
MNF ticket-a MLA atana thlan tlin mi 26-te chu nimin tlai khan Mizo Hnam Runah an inhmukhawm a, MNF Legislature Party an din. MNF Legislature Party leader atan Zoramthanga, dy. leader atan Tawnluia leh secretary atan Lalruatkima thlan an ni. MNF MLA-te hian nimin tlai dar 6 khan Governor Rajasekharan hmuin, sorkarna an siam theih thu an thlen a ni.

No Tolerance Drive
Aizawl Traffic Police-te chuan thuchhuah siamin, Krismas leh kumthar mi tinin dam leh hlim tlang taka an hman theihna atan December 10, Thawhṭanni aṭang khan 'No Tolerance Drive' an kalpui thu an tarlang. Traffic Police tarlan danin, No Tolerance Drive-ah hian a bikin zu leh ruih theih thil dang rûi chunga lirthei khalh, zial zu chung leh mobile phone hmang chunga lirthei khalh, phur rit lutuk (over loading), lirthei chak lutuka khalh, double overtaking leh vehicle document fel leh fel lohte endik a ni.

PRISM lawm
PRISM party chuan thuchhuah siamin, an candidate vote-tute zawng zawng chungah an lawm thu an tarlang a, "Kan policy leh manifesto tihlawhtling turin hma kan la zawm dawn a ni tih kan puang nghal a. Kan ram siamṭhat tuma hma kan laknate kan duh anga a hlawhtlin theih loh avangin political pressure hmanga hma la turin party thar kan din a, a vawikhatna atan MLA election kan chuh ve a, inthlan kalphung siam-
ṭhat (electoral reform) kawnga kan hmalakna te kan beisei phak bakin a hlawhtling," an ti.

Tihdikna
Vanglaini, December 11 chhuaka kum 2019 atana Mizoram UPC budget Rs. 16,40,75,00 tih chu tihsual palh a ni a, Rs. 16,40,75,000 tih zawk tur a ni.