MLA 8 an neih vangin ZPM lawm

Zoram Peoples' Movement (ZPM) chuan thuchhuah siamin, MLA pariat an nei thei chu Pathian hruaina leh remruat a ni tih hriain, lawmawm an tih thu an tarlang a, "MLA tling thar zawng zawngte kan lawmpui rualin, tling zo ve ta lote thinlung takin kan tawrhpui a ni," an ti.

ZPM chuan, thuneihna sang tak nei, inthlang ram kan ni chu lawmawm an tih thu tarlangin, "Mipuiin roreltu tura kan duh chu kan vote hmangin zalen takin kan lantir thei ṭhin. Kan ram mipui tam ber hi retheihna hnuaia sal beh kan la ni a, hei vang hian inthlan laiin sum leh therhlo hmanga vote lei leh hralh chu a la reh hauh lo tih chu a petu leh a dawngtuten an hre chiang em em a ni," a ti a; sum sem hi inthlan result-ah pawh eng emaw chen a lan thu an sawi.

Kan ramah rorelna dik leh ṭha, hleih neih lohna, mipui sorkar siam an intiam ṭhin thu sawiin ZPM chuan, "Chu chu a taka kalpui aiin party mite duhsakna leh hleih nei chunga rorelna kan hmu ṭhin. Kan Bible-a kan hmuh angin inthawina hmangin Pathian an lo be tawh ṭhin a, mi tam tak chuan ram rorelna ai chuan sakhuana (inthawina) hi kan dah chungnung zawk mai thei. Mahse, Pathian chuan inthawina aia duh zawk pathum a nei, chungte chu thuawihna, khawngaihna leh rorelna dikte a ni," a ti.

ZPM chuan, Pathian duh dana mi tin huapzo, ram leh hnam damna leh mirethei lam ṭang policy kalpui chungin politics hi an kalpui zel dawn tih an tarlang a; beiseina sang tak nei chunga ZPM candidate vote tu leh ṭantu zawng zawngte huai leh nghet taka ding tlat turin an sáwm a ni.