BJP-in MLA tharte lawmpui

BJP Mizoram Pradesh chuan thuchhuah siamin, Assembly inthlan result tluang taka chhiar zawh a ni chu lawmawm an tih thu an tarlang a; MLA atana tling thar zawng zawngte lawmpuina an hlan.

Mizoram BJP president Prof. JV Hluna chuan, BJP chuan an beisei angin result nei ṭha lo mah se, Mizorama a vawi khatna atana MLA an nei chu lawmawm an tih a sawi a, "Sorkar thar lo piang tur hi sorkar ṭha leh huapzo sorkar, mipui sorkar a nih ngei kan beisei. Sorkar tharin mipuite'n an thlan chhan ang tak leh beisei ang taka hna an thawh theihna atan duhsakna ka hlan a ni," a ti.

Inthlan buaipuitute hnenah lawmthu sawiin JV Hluna chuan, "In­thlanna muanawm leh felfai kan neih theihna tur a thawktu MPF, NGO-te leh election buaipuitu zawng zawngte chung­ah kan lawm hle. BJP Mizoram chuan inthlan result hi kan pawm," a ti a; BJP chuan theihtawpa sorkarna fawng chelh turte puih an inhuam thu a sawi.