CM-in leilung hausaknate hâi chhuaka hmang ṭangkai zual turin mipui a chah

Zirtiri Residential Science College chuan nimin khan Durtlanga an hmunah college building thar hawnna leh NAAC Grade 'A' an hmuh lawmna an buatsaiha a, khuallian chief minister Zoramthanga chuan, Pathianin leilung hausakna a pekte hai chhuak a, hmang ṭangkai lehzual turin mipui a chah.

Chief Minister chuan, Zirtiri RSC chu in thar an neih avang leh NAAC grade 'A' an hmuh avanga a lawmpui thu sawiin, "Khawpuiah college eng emaw zat awmin, tam tak chu hmunhma rem lo tak takah an awm a, hei hi a veiawm. Zirna-in sangte hma­sawn leh changtlun zelna tur sorkar pawhin tih tak zetin a ngaihtuah a ni," a ti.

Khawvel hmasawnna kal chak tak karah hmathlir ṭha neih a pawimawh thu sawiin Zoramthanga chuan, "Vawiina ṭha leh pawimawha kan hriatte hi kum sawm hnuah chuan a danglam vek thei," a ti a; thiamna leh theihnate a hun mil zela ṭangkaia hman thiam theih nan hmathlir ṭha tak neih a pawimawh thu a sawi.

Khualzahawm Dr R Lalthangliana, Higher & Technical Education minister chuan Zirtiri RSC-in NAAC grade-A a hmu chu thawhhona ṭha vang nia a hriat thu a sawi a, "Hemiah hian duh tâwk mai loin, kum 2027-a assessment in hmachhawn leh turah tuna grade 'A' in hmuh aia sang hmuh tum turin ṭan la ang che u," a ti.

HTE Minister chuan, Mizoramah zirna ṭha an mamawh thu sawiin, "Sorkar pawhin zirna a ngai pawimawh a, zirna-in sang tam zawk din a, a awm sate thawm ṭhat chu sorkarin a theih chin chinah tih zel a tum," a ti a; zirlaite chu certificate holder satliah ni lo a, chhawr tlak thiamna paw chhuak turin a chah.

Inkhawm hi HTE secretary Esther Lalruatkimi'n a kaihruai a, Zirtiri College principal Prof. B Zoliana pawhin thu a sawi.

Zirtiri RSC campus-a in thar Chief Minister-in a hawn tâkte chu academic & administrative block pahnih, academic building block pathum, car parking leh canteen-te a ni. In sakna atan DoNER, RUSA leh state sorkar aṭangin sum hmuh a ni a, thawktute'n cheng nuai 19 an thawh khawm bawk.