Lengpui Airport chei ṭhat hna en chianin hna kalphung a chhia tih a hriat - Duhoma

ZPM Legislature Party (ZLP) member-te chuan nimin khan Lengpui Airport chei ṭhat mek an tlawh a; an leader Lalduhoma chuan, airport chei ṭhat hna kalphung chu a chhia tih a hriat thu a sawi rualin, ZPM an sorkar hunah chuan hna thawk ṭha lo leh a huna thawk zo lote an hrem nghal zel dawn thu a sawi.

Lalduhoma chuan, sum tam tak sênga Lengpui Airport chei ṭhat mek a chhia chu pawi an tih thu sawiin, "A hmuna en chian hian hna kalphung hrim hrim a chhia tih a hriat. Cement chár tawhte pawh kut lâwnga hmehin a sawm mai thei a ni. A chim chu thuhran ni se, a chim bak pawh ṭhiah leh ngai khawpin a awm phah ta a ni," a ti.

ZLP Leader chuan, Mizoramah hmasawnna hnathawh a chhe em em ṭhin tih sawiin, "ZPM kan sorkar hunah chuan contract hi a hun loa zawh a awm dawn lo a, hna thawk ṭha lo leh a huna zo lo chu kan hrem nghal zel dawn a ni," a ti a; airport chei mek chim chu thuneitute'n an chhui ang a, hrem ngai an hrem dawn emaw mipuiin an tih laiin, chhui a nih loh tur thu an hre ta zawk tih a sawi.

Lengpui Airport chei ṭhat mek chu March 10, 2022 khan a chim a, a chim bâk pawh ṭhiah a ni.

Lalduhoma chuan, airport chei ṭhat hna thawktu Kamrul Islam Laskar chu Chief Minister-in a duhsak hle tih sawiin, "KR Constructions hian hmun hrang hrangah hna an thawk nasa a, an hnathawh zawng zawng hi endik a nih loh chuan vanduaina rapthlak zawk kan la tawng thei ang tih kan rin avangin a hna dang pawh endik vek kan duh," a ti.

ZLP tarlan danin, KR Constructions chuan February 8, 2021 aṭangin Lengpui Airport chei ṭhat turah RCC box culvert Rs 94,46,600 man a thawk a, April 21, 2021 aṭangin Upgradation of Operational & Non-Operational Facilities Rs 19,59,00,000 man a thawk a, tender leh work order awm loin thla nga a thawh hnuah, September 20, 2021 khan notice to proceed (hnathawh chhunzawm zel tura hriattirna) ziaka pek a ni.

KR Constructions chuan September 20, 2021-ah hna pathum a rualin a hmu leh a, chungte chu - Rs 2,59,81,057 man internal electrification, Rs 4,14,46,271 man centralised AC leh Rs 91,71,000 man aviation complex aṭanga airport panna a ni. Kamrul-a'n thla sarih chhunga hna lian a hmuh man belh khawm chu Rs 28,19,44,000 a tling.

Lengpui Airport chei ṭhat hna dang chu Zoramchhana’n a thawk a, a vaiin Rs 30,36,74,000 man a ni. Kamrul-a'n hmun pariat dangah contract hna a thawh bawk thu sawiin Lalduhoma chuan, "Kan hriat china a hna thawh zawng zawng hi Rs 1,16,43,96,000 (nuai 11,643.96) man a ni. Heti khawpa duhsakna a hmu hi Kamrul Islam Laskara hian a hming a tum mai niin a lang a, a phenah hna neitu tak tak a awm niin kan ring nghet tlat a ni," a ti.

Lengpui Airport chei ṭhat ennaah hian Lalduhoma bakah ZLP member dang Dr Vanlalthlana, VL Zaithanzama leh Lalchhuanthanga te an kal a ni.