Hindi zir ngei ngei tur chungchangah Mizoram sorkarin thudawn a la nei lo

Mizoram sorkar chuan Union Home minister ni mek leh BJP president hlui Amit Shah-a'n hmar­chhak state-a Hindi ṭawng zir ngei ngei tur nia a sawi chungchangah official-in dawn an la nei lo.

Vanglaini palai zawhna chhangin School Education secretary Dr Lalzirmawia chhangte chuan, Amit Shah thusawi chung­changah thu dawn an la neih loh thu a sawi a, "Thu dawn kan la neih loh avangin ngaihtuahna kan la hmang lo. Thu dawnte kan nei a nih chuan sawiho­te pawh a la ngai turah ka ngai," a ti.

Amit Shah hian April 7, 2022-a Parliamentary Official Language Commi­ttee meeting vawi 37-na­ah, "Hindi ṭawng hi hmar­chhak state pariatah zir ngei ngei tura duan a ni dawn," a ti a; sorkar enkawlna kawnga ṭawng hmanah English thlaktu atana local language ni lo, Hindi pawm a ni tur a nih thu a sawi.

Amit Shah thusawi chung­changah hian MZP chuan thu­chhuah siamin, hmarchhak state hrang hrangah mahni hnam ṭawng hman a nih thu an tarlang a, “Pianpui ṭawng hmang tura nasa taka hmalak a nih mek laia hetiang hmalakna a awm hi hriatthiam har kan ti hle. Compulsory-a Hindi hman a nih chuan hnam bil ṭawng leh pianpui ṭawng nasa taka a khawih dal theih dawn bakah, zirlaite tan phurrit a ni theih dawn a ni,” an ti.